മകൾ വളരുമ്പോൾ

ചില്ലു ഞൊറികൾ

ചേർത്തടച്ചു വച്ച്

ഒരു മീനും ഒപ്പം വളരും .


അവളുടെ

ഇളം ചുവപ്പ് കലർന്ന

ചെവികളിൽ

ഒരു വെളുത്ത  മുത്ത്

തൂങ്ങുമ്പോൾ

മീനിന്റെ ചെകിളകളിൽ

വെളിച്ചം വിതറും .


മകൾ വളരുമ്പോൾ

ഒപ്പം വളരും

ഒരു ചെന്നായ .


സ്വപ്നത്തിലവൾ

കടൽ

കാണുമ്പോൾ

തീരത്തടിഞ്ഞ

മീനുകളുടെ

മാംസം നക്കിനക്കിയുറങ്ങുന്നത്

സ്വപ്നം കണ്ട്

അത് കുറ്റിക്കാട്ടിൽ

പതുങ്ങിയിരിക്കും .


മകൾ വളരുമ്പോൾ

ഒപ്പം പടരും ഒരാൽമരം

ആകാശത്തേക്ക്

കുതിച്ചു കയറും

ഒരു കിനാവള്ളി .


അവളുടെ വിരലറ്റങ്ങളിൽ

പൂമ്പൊടി ,

മഞ്ഞ ,

ചുവപ്പ് ,

പച്ച

വയലറ്റ് .


അവൾ വായിക്കുന്ന പുസ്തകത്തിൽനിന്ന്

പൊട്ടിത്തെറിക്കാനൊരുങ്ങിനിൽക്കും

ഒരഗ്നിപർവ്വതം .


മകൾ ഉറങ്ങുമ്പോൾ

അവളുടെ സ്വപ്നത്തിലേക്ക് നുഴഞ്ഞു കയറാൻ

കാത്ത് നിൽക്കുന്ന കാട്ടുമൃഗങ്ങളുടെ

തേറ്റകൾ

അറുത്ത് കളയാൻ ഒപ്പം കരുതും ഒരു കത്തി .


അവൾക്കൊപ്പം

തേച്ചു മിനുക്കി രാകി

അവളുടെ ഉടലിലൂടെ വഴുക്കികളിക്കും ഒരു വെളിച്ചം .

വിരലുകൾക്കിടയിലൂടെ

ഊർന്ന് ഊർന്ന് ...


2

മകൾ വളരുമ്പോൾ

അവൾ എന്നോട് കളിപ്പാട്ടം ചോദിക്കുന്നു .


ഞാനവൾക്കൊരു ജോഡി

തേറ്റപ്പല്ലും നഖങ്ങളും കത്തിയും

കൊടുക്കുന്നു .

 ഇത് കൊണ്ട് എന്ത് ചെയ്യാനാണ് ?


അവൾ കണ്ണ് കൂർപ്പിക്കുന്നു


അവൾ കാലുകൾ മണ്ണിലേക്ക്

ആഴ്ത്തുന്നു .


ചെന്നായയുടെ

ചുവന്ന കണ്ണുകൾ

ഇരുട്ടിൽ  തിളങ്ങുന്നു .


അവൾ പറയുന്നു

സൂര്യൻ അസ്തമിക്കുന്നുവെന്നും

ഉദിക്കുന്നുവെന്നും അറിഞ്ഞ

അതേ സമയം


"നോക്കൂ

ഇതൊരു നാടകമാണോ ?

ഇതിൽ ഞാൻ ഒറ്റക്കാണോ ?

ഇവിടെ ഇരുട്ടോ വെളിച്ചമോ ?

അല്ലെങ്കിൽ എന്താണ് ?

ഞാൻ ഈ കത്തി വാങ്ങാം .

പക്ഷെ

ഇതിന്റ

മൂർച്ചയിലൂടെ

യാത്ര ചെയ്യാൻ

ഞാൻ ആഗ്രഹിക്കുന്നില്ല .


എനിക്ക് ഈ ചെന്നായയുടെയും

ആൽമരത്തിന്റെയും

കണ്ണുകളിൽ നിന്നും

വിത്തുകളിൽ നിന്നും

ജീവിതത്തെ

എഴുതിഎടുക്കണം .


രൂപമില്ലായ്മയിൽ നിന്ന്

എനിക്ക് എന്നെത്തന്നെ

വരച്ചെടുക്കണം .


മകൾ വളരുകയാണ്


ചെന്നായയും

വളരുകയാണ്