കുച്ച് ദൂർ ഹമാരെ സാഥ് ചലോ

എവിടെ വച്ചോ കേട്ട പാട്ട്

ഓർത്തെടുക്കാനാവാതെ

തങ്ങളിൽത്തങ്ങളിൽ

തടഞ്ഞു നിൽക്കുന്ന മറവി

"കുച്ച് ദൂർ ഹമാരെ സാഥ്

ചലോ "

മറവി

വിളിക്കുന്നുണ്ട്

നിർബന്ധമായിത്തന്നെ

വരുന്നില്ല എന്ന് പറയുന്നുണ്ട്

നിര്ബന്ധമായിത്തന്നെ .

പക്ഷെ

എപ്പോഴെങ്കിലും

ഓർമ്മ വരുമായിരിക്കും

മരിച്ചുപോയവർ

തൊട്ടുമുമ്പ് വരെ എഴുതി സൂക്ഷിച്ച

കടലാസുകൾ .

പ്ലാസ്റ്റിക് കവറിൽ ചേർത്തൊതുക്കിയ

സ്വപ്നത്തെ

താന്താങ്ങൾ തീർത്ത

ചാടിക്കടക്കാവുന്ന

മതിലുകൾ

കവച്ചു

വളർന്നു നിൽക്കുന്ന പുൽക്കൊടികൾ നോക്കൂ .

കാണുന്നത്രക്കു രസമില്ല അവയുടെ ഉടലുകൊണ്ടുരസൽ

ഒളിപ്പിച്ചു വച്ച അനേകായിരം മുള്ളുകൾ കീറി വരയും മനസ്സിൽ .

എങ്കിലുമവർ ,മരിച്ചതിന് ശേഷം

എഴുതുന്നതൊന്നും എനിക്ക് കിട്ടുന്നില്ലല്ലോ

ഇടക്ക് രാത്രിയിൽ ചെറുപൂക്കളുടെ

സുഗന്ധം പോലല്ലാതെ

മറ്റൊരിടത്തും അവളാ

കവിത കുറിച്ച് വക്കുന്നുമില്ലല്ലോ !

അവളാണോ അന്ന് ആ പാട്ട് പാടിയത് ?

അതാണോ ഓർത്തെടുക്കാനാവാത്തതു ?

മരങ്ങളുടെ നിഴലിലൂടെ

ഇഴഞ്ഞു പോകുന്ന മറവിക്കുമേൽ

ഒരു വെളുത്ത വെളിച്ചം വീഴുമ്പോൾ

തിരിച്ചു വരുമായിരിക്കും

ഒരല്പനേരമെന്നോടൊപ്പമെന്ന

ആ

തണുത്ത

മരണത്തിന്നോർമ്മ