Thursday, August 8, 2013

തോന്നല്‍
-------------------------------
ഞാന്‍ ഒരു നപുംസകം ആണെന്ന് തോന്നുന്നു
 കണ്മുന്നില്‍ വച്ച്
 ഒരുവനെ മറ്റൊരുവന്‍ ചീത്ത വിളിക്കുമ്പോള്‍....
എന്റെ ഒരു തള്ള വിരല്‍ പോലും  അനങ്ങുന്നില്ല 

കേള്‍വിക്ക് മുന്നില്‍,
ഒരുവള്‍ ഉടലും മനസും കീറി മുറിഞ്ഞു
അലറി കരയുമ്പോള്‍...
ഞാന്‍ ചിലപ്പോള്‍ ചിരിച്ചു  മണ്ണ് കപ്പുന്നുണ്ട്

ഭൂമി ഇടിച്ചു നിരതുംപോഴോ....
കടലുകള്‍ കരിങ്കല്ലുകള്‍  ഇട്ടു  തൂര്‍ക്കുമ്പോഴോ 
ഒന്ന് ഒച്ച വക്കാന്‍ കൂടി പോയിട്ട്
ഒരെതിര്‍ മൂളല്‍ പോലും പറ്റുന്നില്ല എനിക്ക്

ആണിനെ പെണ്ണോ ...പെണ്ണിനെ ആണോ
ഇല്ലാതാക്കുന്നതും
കൊത്തി നുറുക്കുന്നതും ഞാന്‍ 
കണ്ടതായിപ്പോലും നടിക്കുന്നില്ല

ഇന്നലെ ,എന്റെ മുന്നില്‍ ഇട്ടാണ്
ഒരുവനെ ,മൂര്‍ച്ചയുള്ള വാക്കും വാളും കൊണ്ട് 
വെട്ടി നുറുക്കിയത്
നിങ്ങള്‍  ഒന്ന് ആലോചിച്ചു നോക്കു....
എന്നിട്ടും ചിരിക്കാനോ കരയാനോ അലറി വിളിക്കാനോ ആകാതെ
ഞാന്‍ ഇളിഭ്യയായി നിന്നിട്ടുണ്ടെങ്കില്‍...
എനിക്ക് തോന്നുന്നു
 ഞാന്‍ ഒരു നപുംസകം ആണെന്ന്